أمام سنترال محطة الرمل وقف الأب وإبنته الصغيرة ... كانت إبنته قطعة من القمر فى الثامنة من عمرها .. ربطت شعرها الأشقر الثائر بطريقة (ديل الحصان) بينما إنسدلت خصلاته على وجهها الأبيض كالصباح ... وأمسكت بين يديها حقيبة صغيرة لا تضع فيها شيئا على الإطلاق .. بينما أصرت على رش ثلاث رشات من عطرها المفضل - احضرته لها جدتها فى عيد ميلادها -  متصورة أنها بذلك أصبحت محط أنظار السائرين فى الطرقات ... كان الأب محتارا أما هى قد حسمت إختيارها ...
-    كنتاكى يعنى كنتاكى !
-    يا حبيبتى كنتاكى أكله مش حلو أوى كده ومش هتشبعى منه ... (جاد) أكله أحلى
-    لا أنا عاوزه أكل من كنتاكى .. زهقت من الفول والطعميه
-    صدقينى مش هتشبعك الوجبات بتاعته
-    لا انا شوفتها فى الجورنال .. عاوزه الوجبه الكبيره اللى بيبقا معاها لعبه وبيبسى
يجاريها فى حديثه وفى عقله تدور العمليات الحسابية بمنتهى السرعه ... كنتاكى؟ يمكن الإستغناء عن ركوب التاكسى فى طريق العودة .. الميكروباص سيكلفه نصف التكلفة لو إستطاع القفز بداخله فى الوقت المناسب ... ليس مهما أن يشترى علبة سجائر الـ LM اليوم ... سجائر (كيلوباترا) ستفى بالغرض ...

اخذ يعيد الحساب مره بعد مره بينما فتاته بين يديه صارت أكثر الحاحا ... تحول الطلب العادى الى اغنية .. كانت تنطق الكلمه بتلحين يشبه الأغنية :
-    كـ...نتا ... كى ..... كينتاكو ... كينتاكا ... عشان خطرى بقا عشان خاطرى .

رجائها يزداد ... يعلم أنه سيضعف فى لحظة ما ... إلا أن الحسبه أبت أن تستجيب... أخذ مخه يعيد الحساب من البداية محاولا ضغط المصاريف الى الحد الأقصى ...

هل الميكروباص ضرورى الى هذا الحد ؟ الترام السكندري سيكلفه ربع التكلفة لكن سينقله فى اربع اضعاف الزمن ... ليكن المترو إذن .. هل السجائر مصيرية الى هذا الحد ؟ السجائر مضرة وهو يفكر فى الاقلاع عنها منذ زمن .. ربما حان وقت التنفيذ .. و يستطيع أن يقترض سيجاره من حسن ... مازالت الجنيهات القليلة فى جيبه لا تكفى ثمن الوجبة اللعينة .. يعرف أن جملة فتاتة القادمة ستكون القاتلة ...

-    عاوزه كنتاكى عشان خاطرى .. ماما لو كانت هنا كانت أخدتنى هناك علطول ... هى ماما مش هترجع من السفر؟ انا عاوزاها ترجع من السفر عشان تاخدنى كنتاكى طالما انت مش عاوز ...

يعلم جيدا أن أمها فى سفر لا عودة منه ... ويعلم أيضا أن ما فى جيبه لن يكفى ثمن الطعام .. ضغط المصاريف الى الحد الأقصى وأخذ يفكر فى كافة الإحتمالات .. ثم وصل الى تلك المرحلة التى تداخلت فيها كل الارقام وقرر أن يضرب عرض الحائط بكل شىء ... قال لها وكإنما إتخذ القرار لتوه :

-    يلا بينا على كنتاكى !
صرخت بفرح وقفزت تحتضنه بحب حقيقى وهى تلثم خده .. هذه هى مكافأته الحقيقية التى يهون أمامها أى شىء ... إبتسم وحمل جسدها الصغير فوق ظهره وسارا نحو أنوار المطعم الساطعة فى الميدان المزدحم ...

-    عارفة أنتى هتاكلى إيه فى كنتاكى النهرده ؟
-    أه .. فراخ متبله وبطاطس وبيبسى و ....
-    يااااااه .. فراخ متبله ... حقيقى صعبانه عليا الفراخ
-    ليه ؟
-    بتبقى فراخ صغيره ... فى نفس سنك كده .. وبيخدوها من باباها ومامتها مع انها بتكون بتلعب وبتتنطط وبتنام بالليل جنب باباها زى ما بنعمل سوا .. عارفه بياخدوها فين ؟
-    فين؟
-    بيحطوها فى اقفاص كبيره اوى ... مع فراخ تانيه صغيره برضو ... وبيقعدوا كلهم يعيطوا عشان عاوزين يرجعو البيت .. لكن هما مش بيرجعوهم البيت .. هما بيدبحوهم بسكينه حاميه أوى وبيشيلو الريش بتاعها وبعدين بيحمروها فى الزيت
-    والفراخ دى بتتوجع لما بيحصل لها كده ؟
-    طبعا بتتوجع .. انتى عارفه انا ليه مش بحب كنتاكى ؟
-    .........
-    عشان بفكر هيحصل ايه لو جه ناس عمالقه واقوياء .. وهجموا علينا فى البيت وخدوكى منى حطوكى فى قفص كبير مع بنات كتير حلوه زيك وقعدتم كلكم تعيطوا عاوزين ترجعوا البيت
-    وهيعملو فينا ايه ؟
-    هيعملو فيكى زى كنتاكى .. هيدبحوكى بسكينة حامية اوى ويفصلو جلدك عن لحمك ... وينضفوكى كويس ويشيلو كل الدم من جسمك ويحطوكى فى بقسماط وخلطه سريه !
-    ياااااااى ... وهما بيعملو كل ده ليه ؟
-    عشان الناس العمالقه دى بتجوع ... واكلهم الاساسى هو البنات الصغيره اللى زيك ... هيحطوكى فى طبق ومعاكى شويه بيبسى وبطاطس وكول سلو ويبيعوكى للناس علشان تاكلك
-    يعنى انا فى كنتاكى دلوقتى هاكل بنت صغيره زيى !
-    لا يا حبيبتى .. انتى هناك هتاكلى فرحه صغيره كانت بتلعب مع صحابها وبتنام فى حضن باباها علشان يحكيلها حواديت بس عشان احنا اكبر واضخم من الفراخ فا كنتاكى بيدبحهم علشان ناكلهم
-    يععععععععععععععع انا كنت بحسبك مش عاوز تاخدنى عشان الفلوس
-    فلوس ؟ الفلوس كتير ... انا بس صعبان عليا الفراخ

كانا قد وصلا الى المطعم الشهير .. انزلها من على كتفه وسارا باتجاه السلم الرئيسى

-    بابا
-    ايوه ؟
-    ودينى عند (جاد) ... انا مش عاوزه اكل فراخ صغيره كانت بتلعب وتتنطط
-    ليه ؟ كنتاكى حلو وانا عاوز ابسطك
-    لا (جاد) كويس ... انا حبيت الفول والطعميه اللى عنده
-    ما تخلينا فى كنتاكى ... هى صحيح فراخ غلبانه هتنزل بطنك بس هتشبعى
-    لا مليش دعوه انا عاوزه اكل عند (جاد)  ... ودينى عند (جاد)  لو بتحبنى ... ودينى عند جااااااااااااااد

 * إضغط على أى صورة معروضة فى المدونة لتكبيرها
* الموضوع منشور ومترجم للانجليزية على الرابط التالى (شكرا لرزان على ترجمتها الاحترافيه)


النهرده كنت مع أحسن شباب مصر !!

هى دى الحقيقة الى كونتها بعد زيارتى النهرده لمستشفى الهلال الأحمر فى رمسيس القاهرة , للتضامن والتبرع لأهل غزة اللى بيتعالجوا هناك ... اليوم كان رائع .. وصلت القاهره قبل المعاد بساعه .. قابلت (سعاد) صديقتى العزيزة , واللى كانت عاوزة تتبرع بدمها .. بعد شويه كلمت (إيناس) ... بجد مدونة رائعه وبتنبض بحيوية ونشاط ملهاش حدود .. وهى اللى فكرت ونظمت للفكرة الرائعه دى ... كلمتها وعرفت منها مكان التجمع بالظبط وروحت هناك ... لقيتها هى و (بنت خيخة واى كلام) وعدد من المدونين ... اد ايه اخلاقهم عاليه وثقافتهم ممتازه .. والأهم من كل ده حبهم للخير وأستعدادهم الحقيقى لعمل أى حاجه فى سبيل ان اليوم ده يكون ناجح , والأروع إن اللى بيجمعنا كلنا هو التدوين وحبنا لعمل الخير ... مش مهم اخوان ولا حزب وطنى ولا ناصرى ولا ملكش حزب ... مش مهم تكونى محجبه او لابسه نقاب او مش محجبه خالص ... مش مهم تكون مسلم ولا مسيحى ... المهم انك عاوز تعمل الخير وبس ..

مع مرور الوقت بدأ عدد المدونين يزيد ويزيد ... انا للأسف مش فاكر أسم كل اللى حضروا .. لكن أذكر مثلا داليا قوس قزح ... أد إيه إنسانه رائعه وصديقه للكل وبتساعد وبتهتم بكل حاجه .. وطبعا مقدرش انسى وجود احمد الصباغ خال المدونين .. انسان بسيط وضحوك وشخصيته حلوه جدا .. وكان فيه (الكابل) الرائع اصحاب مدونة (ِشفقه واحسان) ... مدون ومدونه متجوزين .. قمه فى الادب والاخلاق والتعامل الراقى مع كل الناس اللى حواليهم .... طبعا كان فى مدونين كتير تانيين لكن بصراحه مقدرتش احفظ كل الاسماء ... هذكرها فى نهاية البوست نقلا عن مدونة داليا (قوس قزح).. المهم إنكلهم كان بيجمعهم التعاون الشديد .. بجد الشباب دول النهرده  كانوا بيتخانقو على خدمة المصابين الفلسطينيين ... فى الصغيره والكبيره .. لدرجة اننا كنا بنخطف شنط العصير والتبرعات من بعض عشان كلنا عاوزين نشارك بأى مجهود حتى لو بسيط ..

اتجهنا للمستشفى وزرنا المصابين فى الغرف .. الغرف نضيفه والخدمه كويسه اوى ووجبات الأكل شكلها نضيفه ومغذية ... للاسف المصابين بجد حالتهم صعبه .. انا شتمت - فى سرى طبعا - الاسرائليين بكل الشتايم القذرة الى اتعلمتها فى سن المراهقه من اصدقاء السوء ... انا مشوفتش عمرى بهدله كده فى ناس مدنيين .. والله صور المصابين الروس فى الحرب العالمية التانية نتيجة القصف الالمانى كانت ارحم من الى انا شوفته النهرده رغم ان المصابين الروس كانوا عسكريين مش مدنيين ...

كمان لاحظت من كلامى مع المصابين أن ملهمش اى انتماء سياسى ... لا حماس ولا فتح ولا الجهاد ولا العفريت الازرق .. كلهم ناس عاوزه تعيش فى سلام وتشتغل وتكسب رزقها وتربى عيالها زى اى حد .. لاقو فجاه الصواريخ فوق دماغهم بدون اى مبرر .

مقطعش قلبى اكتر من مشهدين ... الاول لشاب فلسطينى .. فى نفس سنى وسنك .. رجلة اتقطعت بسبب اصابه مباشره من صاروخ اسرائيلى .. والمشهد التانى لاب فقد ابنه من فتره قصيرة جدا .. يعنى تقريبا ابنه اتوفى قبل احنا منطلع المستشفى مباشرة .. اد ايه كان صابر ومحتسب ابنه اللى عنده 15 سنه شهيد عند الله - عرفت بعد كده ان ابنه اسمه نادر قدورة - .. ولما سالته ناوى يعمل ايه رد بدون تفكير : راجع غزه... هترجع تحت القصف ؟ اه  .. هترجع رغم الموت ؟ اه .... هرجع يعنى هرجع ...

هسيبكم مع الصور ومع تحديثات لنتائج الزيارة وأسماء الحاضرين ... الخ

المدونين متجمعين خارج المستشفى

 

وهنا داخل المستشفى

 

أحمد الصباغ كان مهتم بالمتابعه والتصوير والمساعده

 

سعاد مع أحد المدونين .. للأسف مع كترة العدد نسيت أسمه مع أنه شخصيه فى غاية الروعه

أصابه صاروخ أسرائيلى

من أكتر المشاهد المؤلمه .. مصاب فقد ساقه

أصابته شظية صاروخ فى أنفه

ضياء بيوتيفول مايند

وومن امراة بعقل رجل

شوية كلام

مها زين انها الحياة

بنوتة مصرية

وحدى لكن ونسان

دعاء مواجهات

الازهرى

عرفة الاسيوطى

ايمان ..سوبيا

تعالو نتفق ... إسرائيل متفوقة على العرب ماديا وتكنولوجيا وعسكريا ... وتعالو نتفق إن أى حرب من أيام الحرب العالمية التانية وحتى اليوم بتعتمد إعتماد كبير جدا على الدعاية والحرب النفسية ...

لو اتفقت معايا على النقطتين اللى فوق دول يبقا لازم اقولك على حقيقة بتقول ان العالم النهرده بيشهد ثورة فى وسائل الاعلام , من خلال انتشار قنوات فضائية وحاجات تانية اسمها (الاعلام البديل) يعنى الاعلام الى يقدر الناس العادية الى مش بيشتغلوا فى الصحافه او بيملكوا قنوات اذاعية او تليفزيونية انهم يعملوه .. زى الاعلام من خلال الفيس بوك والمدونات والجايكو والتويتر واليوتيوب ... الخ كل دى اصبحت وسائل اعلام مهمه متقلش اهمية – ان كانت تزيد – عن وسائل الاعلام التقليدية .

لو صدقت كلامى اللى فوق يبقا لازم تصدق ان الشباب اليهودى المنتمى لقضيته وبيدافع عن بلده وحقها فى الحياه من خلال ابادة شعب كامل بحجة انهم بيضربوا عليهم صواريخ يادوب بتهز النجفة بتاعة البيت عندهم .. الشباب دول عارفين يستغلوا امكانيات اعلامهم البديل من يوتيوب وتويتر وفيس بوك ... الخ اقصى استغلال فى صالح قضيتهم ... يمكن لان عددههم قليل فا عارفين قيمة التجمع كويس .. يمكن لان دى موهبه فى الانسان اليهودى بشكل عام انه بيعرف يلفت انتباه العالم كله لقضيته .. يمكن لانه مستغلش اليوتيوب فى نشر فيديوهات من عينة (بحرينية جامدة موت فى حضن سعودى تخين) .. يمكن لانه مستغلش الفيس بوك فى التظبيط وعمل جروبات تبادل الزوجات ... يمكن لانه مستغلش الجايكو والتويتر فى التلسين على اعراض البنات المحترمه ... تعددت الاسباب والنتيجه واحده .

يبقا لو انت مقتنع بكل كلامى يبقا انت دلوقتى مقتنع ان اسرائيل متفوقه علينا فى كل عناصر الحرب دى الا فى عنصر واحد هو عنصر الاعلام .. لان احنا بنملك نفس الادوات اللى الشاب اليهودى بيملكها .. بالتالى اذا كنا رضينا بالتفوق الاسرائيلى الحتمى علينا فى كل المجالات مينفعش نوافق على التفوق الاعلامى علينا لاننا على الاقل متساويين فى النقطه دى .

فى الفتره الاخيرة شويه ولاد وبنات من اجدع بنات وشباب الانترنت .. كان ليا شرف معرفة كتير منهم بشكل شخصى واللى معرفوش منهم شخصيا اعرفه من خلال لقائنا الفكرى فى عالم التدوين ... الولاد والبنات دول دعوا كل الى يعرفوه انهم يوصلوا صوتهم للعالم الغربى الحر .. وللعالم العربى الجاهل الى مش عارف حقيقة الى بيحصل على ارض غزه وواهم نفسه بقضايا فرعية زى الخلاف على احقية حماس او فتح بالسلطة ...

انا فكرت لقيت ان لو كل شخص اشتغل فى اتجاه لوحده الجهود هتتشتت , ومحدش هيستفيد بتجربة الاخرين , ناهيك اننا مش هنعرف نوصل صوتنا للعالم الغربى كناس متحضرة بتقدم محتوى ممكن الوثوق فيه . مش مجرد شتايم او خناقات او مناقشات حامية فى قاعات الشات .

بناء على كل ما سبق انا عملت موقع Now in Gaza هتلاقوه على الرابط ده http://nowingaza.blogspot.com باللغة العربية والانجليزية بالاضافة لقسم المالتى ميديا ... القسم العربى بيقدم محتوى اخبار للقارىء العربى عشان يعرف الاخبار الحقيقيه لحظه بلحظه , القسم الانجليزى بيقدم أخبار للقارىء الانجليزى لحظة بلحظة برضو عشان يكتشف الفرق بينها وبين البروباجندا الاسرائيلية .. مثلا على سبيل المثال اكتشفت من مجرد مطالعه بسيطه للمواقع مدى الاختلاف الرهيب بين الاخبار اللى بيكتبها موقع بى بى سى العربى وموقع السى ان ان الانجليزى .. والاختلافات كتير .. اما قسم المالتى ميديا فا هنحط فيه ملفات الفيديو واليوتيوب والصور الخاصة باللى بيحصل فى غزه

الحاجة الوحيدة الى بتواجهنى كمشكلة فى الموقع , واللى بدعوكم انكم تساعدونى فى حلها هى انى مش هقدر اواكب على كم الاخبار المتدفق لحظه بلحظه , خصوصا بالنسبه لموقع بالعربى والانجليزى , ناهيك عن ضرورة وضع كل الصور وملفات الفيديو .. يعنى باختصار مجهود مستحيل يقوم بيه شخص واحد .. من هنا جاتلى الفكرة الى عاوزكم تساعدونى فيها ...

كل واحد عنده استعداد يتابع او ينقل او يبعت او يترجم او يجمع الاخبار عن غزه يبعتلى ايميل يطلب فيه دعوه للكتابه فى الموقع , وانا هعمله Invie بحيث يكون عضو مشارك فى المدونه , ولما يقبل الدعوه هيلاقى المدونه ظهرت فى لستة المدونات بتاعته زى متكون مدونه مملوكه له .. كمان هديله ملف وورد صغير يشرح بالتفصيل ازاى يحط الاخبار بشكل صحيح فى اقسامها الصحيحه .. وبتمنى ان بنهاية فتره قصيرة نكون جمعنا عدد ضخم من البلوجرز العرب والاجانب من العالم الحر المسلمين والمسيحيين المحترمين الى عاوزين يقدموا اعلام بديل حقيقى يطغى على الاعلام الاسرائيلى المشوه والمغلوط .. ومع تدفق الاخبار وزيادة المشاركين يستمر موقعنا فى تقديم الاخبار لحظه بلحظه بالمعنى الحرفى للكلمه .

أنا كلى عشم فى ناس معينة .. مش هتكسف وهقول اسماءهم علنا .. انا كلى امل فى نوارة نجم (جبهة التهييس الشعبية) ... فى زينب (بنت مصرية) .. فى رحاب (كوكب أبى) ... فى احمد شقير (حكاوى اخر الليل) و أحمد الصباغ وغيرهم كتير جدا انهم يشاركونى الحرب الاعلامية بتاعتنا

مش مطلوب تكون صحفى او خبير اعلامى او سوبر مان ... مطلوب بس انك تنتمى ولو لمرة واحده لقضية كبيره وتبعت ولو خبر واحد كل يوم .. هيفرق كتير .

وياريت محدش ييجى يقولى انه مش مقتنع بالقضية او انه مع فتح ضد حماس او حماس ضد فتح .. او حدود مصر وامنها القومى ... الخ .. لان انا شخصيا ضد فتح وضد حماس .. ومع مصر .. لكن كل ده لا ينفى ان انتمائى الوحيد للناس المدنين اللى بيموتو كل شويه منغير اى ذنب .. انتمائى لبنت ماتت كان ممكن تكون حبيبتى .. وطفل مات كان ممكن يكون ابنى .. وست ماتت كانت ممكن تكون امى ...

أما لو كسلت تعمل اى حاجه من دى .. ياريت على الاقل تخصص بوست من مدونتك تتكلم فيه عن موعنا وتحط فيه اللينك بتاعنا يمكن حد يدخل لنا من عندك وتبقا اضفت لنا برضو .. ابعت جايكوهايه او بوست تويتر .. دخل صحابك على جروب الفيس بوك الخاص بالموقع .. اكيد هتقدر تشارك معانا ولو بأقل القليل

باختصار : مش مطلوب منك اكتر من انك لو لقيت خبر جديد على جايكو او فيس بوك او على الريدر بتاعك يخص غزه بالعربى او الانجليزى (وطبعا الاهتمام الاكبر بالاخبار الانجليزيه) او من خلال صورة او ملف فيديو انك تحطها فى موقعنا ... هدفى فى النهايه اننا نعمل موقع بيقوم على الكتابه فيه عدد ضخم من الافراد بشكل يعمل تحدث شبه لحظى للموقع يخلينا نحتل قمة صفحات البحث على جوجل وياهو ونحارب سياسة التعمية الى بيمارسها الشباب الاسرائيلى

لو عاوز تعرف اكتر ازاى ممكن تساعدنا دوس هنا .

لو عاوز تشاركنا ابعت رساله على nowingaza@hotmail.com تطلب فيها الاشتراك فى المدونه .. وابدا فى ارسال الاخبار بمجرد ما تجيلك الدعوه وتقبلها .

تحياتى للجميع .