لما جبت موبايلى النوكيا E63 بضمان راية , حصل وصادفتنى بعض المشاكل البسيطة .. محبتش أبتكر وأخترع خصوصا إن الموبايل كان لسه جديد , وحبيت أستشير حد متخصص فى المشكله البسيطة اللى كانت عندى ... بالتالى لقيتنى رايح لتوكيل راية علشان يشوف الموبايل اللى اشتريته مش شغال مظبوط معايا ليه .

حديثا عن طريقة الكلام والمقابلة والمعاملة .. أحب أقولك إنك لو دخلت هناك على إنك عاوز تشترى موبايل من هناك هتشوف إبتسامه واسعة وترحيب كبير وإجابه على كل أسئلتك .. أما لو كنت رايح تطلب إستشارة أو تصليح لموبايلك الموجود تحت الضمان .. الإبتسامة هتتضائل وهتتحول المعامله لطريقة جافة وكإنك غلطت لما رحت تطالب بحقك اللى إنت دفعت تمنه مقدما مع تمن الجهاز بدون مناقشة .

حديثا عن إسلوب الصيانة فا هو إسلوب أقل ما يوصف به انه إسلوب غبى , الموظفين الموجودين مش بيحاولو يحلو المشكله بقدر ما بيحاولو ياخدو الجهاز ويدوك إيصال وتدوخ فى السؤال على جهازك بعد كده بحجة إنه موجود فى الصيانة , الإسلوب التشددى ده بيخليك تخاف انك تروح هناك لو صادفتك مشكله لانك مش هتتلاقى حل عملى لمشكلتك بالاضافة انهم هيدوخوك لحد ما تستلم موبايلك تانى , رغم ان الموبايل جهاز عملى جدا فى الشغل ومن الصعب الواحد يقعد منغيره فترة طويلة .

بعد 3 ثوانى من النظر لجهازى بص لى الموظف نظرة الواثق من امره وقالى : حضرتك الجهاز فيه فايرس وعاوزين نغير السوفت وير كله .. بعد ما نعمل فورمات للجهاز طبعا .

سالته بدهشه : فايرس ايه ؟! انا موصلتوش للكمبيوتر اصلا ! وفورمات يعنى هتمسح كل المتخزن عليه ؟ ولا انا فهمت الكلمه غلط ؟

حضرتك فهمت صح .. كل حاجه على الموبايل هتتمسح .. وهتستلمه مش بعد اقل من إسبوع علشان نكون لحقنا خلصنا الشغل , وياريت تاخد الشريحه واى حاجه اضافية لاننا مش مسئولين عن فقد أى حاجه مش متعلقه بالجهاز !

حاولت اوضح له وجهه نظرى وانا بقول له :

يا فندم ياريت تفهمنى .. أنا صحفى .. شغلى كله معتمد على الموبايل .. الأرقام اللى معاك دى مينفعش أفقدها .. لإن نصها ارقام فنانين وصحفيين ورؤساء تحرير ومطربين وممثلين !

جاوبنى وكإنه اتحول لمكنة إجابات سخيفه :
ده كل اللى اقدر اقولهولك .. الا لو عاوز نحاول نصلحه هاته بكره بقا ان شاء الله علشان المهندس المختص يكون موجود لانى مش عارف فيه اوى

وإنت مش المهندس المختص ؟ ولو انت مش عارف فيه اوى أمال مين يعرف ؟ هو مش إنت التوكيل الرسمى للصيانه ولا انا بيتهيالى ؟

وسؤالى الأخير مكانش تأليس بقدر ما كان سؤال حقيقى بعد ما حسيت انى فى برنامج مسابقات على شاكلة (الكاميرا الخفية) مش فى مكتب صيانه معتمد من شركة المفروض انها محترمه .

المهم انى فى النهاية قعدت مع نفسى واكتشفت ان كارت الميمورى مكانش داخل بشكل مظبوط فى التليفون وده اللى كان عامل المشكله دى .. لا فايروس ولا سوفت وير ولا فورمات ولا أى حاجه .. كل ده كان استسهال واستغلال من شركة راية

وسط كل الاستغلال ده من شركة رايه .. شائت الظروف انى اتعرف على بنت صغيره وجميله .. اسمها شمس .. قررت انها تقف فى وش كل الكلام ده وتواجه نصب شركة رايه .. يمكن انا مشكلتى صغيرة مقارنة بمشكلتها .. الفارق الوحيد انها قررت تواجه ومتسكتش على النصب .. ووقفت بيافطه تدعو لمقاطة رايه وعملت شبه اعتصام بسيط على سلالم فرع راية فى القاهرة ...

كمان عملت شمس على الفيس بوك جروب ضد ظلم شركة راية رافعة شعار : (عاوز نوكيا متروحش رايه) , والصحافة اهتمت بالكتابة عن الجروب ده واللى عدد اعضاؤه بيمثلوا سبه فى حق شركه مش عارفه تحافظ على اسمها المتدهور فى السوق المصرى

مواجهة شمس ورفضها الظلم وصلها لقاعة المحكمه دفاعا عن حقها ومطالبتها بيه .. وبكرة عندها جلسه مهمه فى المحكمه كاولى جلسات قضيتها مع راية , وبتتمنى منكم مساندتها فى قضيتها والوقوف ضد نصب الشركات اللى بتعمل بروباجاندا واصحابها بيعملو ملايين على حسابنا .

انضموا للجروب وساندوا شمس ضد رايه .. واحكو عن تجاربكم مع راية

محمد حمدى