Demaghy: January 2008

January 24, 2008

احيانا تشعر بالزهو والفخر من نفسك .. هل صادفك هذا الموقف من قبل ؟

شخصيا كثيرا ما تصفحت كتاباتى .. اجد نفسى اهتف مخاطبا اياها : ايه الحلاوة دى يا واد ... ايه الكتابه المتنوعه دى .. ايه الاسلوب المرن دة

احيانا اخرى افتخر بقدرتى على المناقشه المحترمه والجدال القائم على الحقائق العلميه .. احيانا اتخيل نفسى القى المحاضرات العلميه على طلاب الصحافه والفن والادب .. اتخيل نفسى فى حفل توقيع روايتى الجديدة وقد اصطف المعجبون حاملين روايتى ذات الالف صفحه .. كل منهم منى نفسه بعدة شهور من القراءة المتانيه لكل سطر كتبته على ضوء شاشه الكمبيوتر ...

احيانا اتخيل يوسف شاهين وهو يرقص طربا عندما اوافق على ان يخرج اخر رواياتى ويحولها لاحد افلامه , اما خالد يوسف .. هذا الوغد سيضطرنى لتغيير رقم هاتفى للمرة العاشرة فى اقل من اسبوع .. لا يصدق اننى رفضت التوقيع على شيك بعشرة مليون دولار ليتولى هو اخراج روايتى الجديدة تحت الطبع , اخذ يوسط كل عامل فى الوسط الفنى بدايه من فراش ماسبيرو حتى عادل امام دون جدوى ...

اتخيل ان عمرو اديب يهاتفنى : ايه يا ابو حميييييييد متتاخرش النهردة عن الاستوديو عاوزين نناقش سلسله مقالاتك فى الدستور .. الحلقه جامدة وفيها مزز مووووووووووز يا حمادة

اما محمود سعد .. يجب الا البى مطلبه للحضور على شاشه البيت بيتك , لاننى سكون منشغلا بشدة مع معتز الدمرداش فى حلقه 90 دقيقه .. حقيقه لا احب معتز , الا ان الظهور معه سيجعلنى اروج لبرنامج ( دماغ حمادة ) الذى اعد لتقديمه لمدة خمس ساعات متواصله على روتانا ليصبح اطول برنامج توك شو عربى !

اتخيل يوم اعتذارى عن الكتابه للمصرى اليوم بسبب ظروف مرضى .. يومها سيبكى القراء امام اكشاك الجرائد , وينخفض توزيع المصرى اليوم بمقدار مائه الف نسخه فى اليوم .. بينما يحادثنى الرئيس مبارك ويطمئن على صحتى الغاليه , ويعرض على العلاج على نفقه الدوله – رغم اننى اعانى من كالو صغير فى اصبع قدمى اليسرى – الا اننى ارفض العلاج على نفقه الدوله ...

" كفايه اللى بتعمله عشان مصر يا ريس .. ربنا يعينك ويقدرك "

وبعدها اتصل بتلاميذى فى الديسك المركزى للاهرام لينشروا ان حالتى الصحيه ارتفعت فور مهاتفه الرئيس لى ...

انتهى من اتصالى بتلاميذى فى الاهرام لأرد على شائعه طلاقى لمنه شلبى التى نشرها انصاف المتعلمين الذين يكتبون فى صفحه الفن فى الدستور .. سيعلم ابراهيم عيسى مدى غضبى منه غدا عندما يمر لإستلام مقالى الاسبوعى .. .

ثم تأتى الصفعه ...

دائما ما تأتى الصفعه ... وهذا هو اسوأ ما فى الامر

قد تاتى الصفعه فى شكل تدوينه لاحمد شقير ...

بوست فى مدونه " أنا جعان " ....

فكرة جديدة من إنجى ..

تحليل جديد من ياسمين.

تسجيل جديد لاحمد الدرينى على تيت راديو ...

تصميم ويب مبهر وجديد ...

قد نختلف كثيرا حول ماهيه الصفعه .. الا انها دائما ما تاتى .. ودائما ما تستخرجنى من هاله الغرور الفنتازى التى اسقط فيها باستمرار .. فقط لتقول لى ان هناك دائما ما هو افضل .. هناك دائما ما لا تستطيع التعبير عنه بهذة القوة .. هناك دائما من يستطيع مجادلتك فلا تستطيع الصمود امامه ...

دائما ما يوجد هناك الافضل

ودائما ما يكون رد فعلى واحدا فى كل هذة الصفعات ... فى البدايه اشعر بغيظ شديد من هؤلاء الذين وجهوا صفعاتهم الى ..

" اه يا ولاد العفريته .. كتبتوها إزاى دى ؟! "

والغيظ هنا غيظ " مهنى " بحت ولا يمت للغيظ الشخصى بصله , فمعظم من تحدثت عنهم اصدقاء اعزاء ...

وبعد مرحله الغيظ تأتى مرحله التفكير ...

" مش جه الوقت تبطل احلام وتتعلم من الى احسن منك وتكمل المشوار؟ "

صح .. هكمل المشوار .

Labels: موضوعات ساخرة شاخرة, موضوعات شخصيه

وصله دائمه

17 دماغكم

January 13, 2008

فى مصر .. اقتل تلاته تقتل الرابع مجانا !

إمبارح لما إتخانقت مع الزبال .. وبعد مرحله طويله من الشد والجذب معاه عن سبب إنه بيلم الزباله من كل العمارة إلا شقتنا .. سمعت كلام كتير من الى بسمعه من كل الناس ... يابيه إنتو الى ساكنين فى الدور الأخير .. يا بييه والله الشغل زى الزفت ومش بيدونا مرتبات كويسه ...

بعد إن إنتهت المشكله بدون حل.. لقيت نفسى عمال أفكر أقتل الراجل بتاع الزباله دة ! يمكن يبعتولنا بداله واحد أكثر نشاطا أو حاجه , طبعا دة مكنش من تداعيات المذكرات الدمويه أنا لسه موصلتش لمرحله إنى أتقمص شخصيات أبطال قصصى يعنى .. أنا عارف إنى مجنون .. بس مش للدرجه دى ...

أما عن تفكيرى فى القتل كان بسبب الخبر الى قريته من كام يوم عن أميرة سعوديه خبطت تاكسى بعربيتها الهامر الى كانت طايرة بيها على 120 كيلو عند ميدان التحرير ! وقتلت سواق التاكسى المصرى محمد حسن وإتنين زباين أذربيجانيين ( يعنى من دوله أذربيجان ) كانوا معاه .. وشاء قدرهم المنيل انهم يقفو قدامها وهى طايرة زى المكوك الفضائى فى أزحم منطقه فى القاهرة !

بعد ما شفت تحليل القاهرة اليوم للخبر .. وكنت بتفرج على التليفزيون مع عيلتى .. سمعت أراء كتيرة من كل الموجودين .. كان معظمهم بيقولو أن لازم الأميرة دى تاخد أفصى وأقسى حكم , وإن مينفعش مسلسل التهور فى القيادة ... إلخ

أما أنا فكان رأيى مخالف لرأيهم كلهم ... قلتلهم الست دى هتطلع من الموضوع دة زى الشعرة من راس عيل مصاب بالسرطان من الى بنشوفهم فى أعلانات مستشفى الاطفال الجديد ... قلتلهم إنها هتجيب أكبر محاميين مصريين .. وهيروحو لأسرة الراجل المصرى الى مات ... ولإننا شعب مصر أغلبنا متدين , خصوصا الناس من البيئات الشعبيه .. فا المحاميين أو المتفاوضين دول هيفتتحو كلامهم إن الديه أمر مذكور فى القرأن .. وإن الأميرة السعوديه عاوزة تدفع ديه القتيل الى هى قتلته خصوصا إنه كان قتل خطأ مش عن تعمد أو ثأر أو كدة ...

أما السيناريو التانى الى قلتلهم عليه هو إنهم هيقولو لأهل السواق الى مات فى حاله رفضهم الدعايه الدينيه وإصرارهم على عدم سحب البلاغ أنهم محاميين جامدين أوى .. وإن الأميرة السعوديه مش هتقضى يوم واحد فى السجن .. وحتى على اسوأ الفروض مش هتاخد حكم جامد لإنه قتل خطأ وحادث سير مش قتل عمد ... مع شويه كلام منطقى زى : مهما حصل للاميرة دة مش هيرجعلكم إبنكم الى مات .. إنما الديه هتستفيدو بيها إنكم تبنوا بيها مستقبلكم وتعيشوا على سطح الأرض من جديد .. دة غير طبعا إنكم هترضوا الله ورسوله ... إلخ

وقلت لكل الى سمعنى يومها إن الأخبار هتطلع علينا كمان كام يوم بخبر التصالح مقابل دفع حوالى مليون جنيه لأهل الضحيه وخلاص على كدة ..

وفعلا طلع كلامى صح ... كان يوم وطلعت علينا الجرايد والمواقع بخبر التصالح بين الاميرة وأهل القتيل .. لكن يظهر إن الأميرة كانت بخيله شويه أو أهل الضحيه كانوا قنوعين زيادة عن اللزم .. لإن المبلغ المدفوع كان 350 الف جنيه ( فقط ثلاثمائه وخمسون ألفا من الجنيهات ) !! وانا حبيت اكتب الرقم باللفظ عشان محدش يقول إنى غلطان ...

يعنى إنك ترمل ست وتيتم عيله وتحرق قلب أم وأب كوووول دة فى package واحد مش بيكلفك أكتر من 350 الف جنيه بس ... يابلاش دة التسعيرة كدةزادت أوى عن زمان أو دة يمكن لفرق الدفع ما بين الحكومه وبين القطاع الخاص .. الحكومه مثلا فى حادثه العبارة دفعت 36 الف لكل متوفى يعنى انا لو من اهل محمد حسن ( قتيل الهامر ) أبوس إيدى وش وضهر إن إبنهم إتفرم تحت عجل هامر سعودى مش غرقان فى عبارة من بتوع عبارات السلام ...

وهكذا كانت نبوئتى أنا الى صح .. والنهاردة أخلوا سبيل الاميرة السعوديه بكفاله عشر بكاوى .. يعنى الموضوع كله على بعضه مكلفهاش حتى نص مليون جنيه مصرى ... وهكذا هتنام هى معززة مكرمه فى السعوديه واهل الضحيه هيبدأو حياه جديدة بمبلغ أقل من تمن شقه نص كم بتبص على البحر فى العجمى !

عموما حظ أهل محمد حسن يعتبر كويس مقارنه بأبو الطفله حبيبه .. الى قطع لحمها كلاب الأمير ترك السعودى الى قاعد فى فندق فى مصر .. وفى النهايه تم الافراج عن ... الكلب ايوة انتو مقريتوش غلط .. الكلب هو الى كان محتجز فى الحجر الصحى وتم الافراج عنه .. اما الامير ترك . فا طبعا محدش يقدر يحقق معاه ناهيك عن انه يتسجن ...

علشان كدة من فضلكم بعد كدة وانتو ماشيين فى الشارع او راكبين تاكسى ركزو كويس .. ومتسمحوش لأى عربيه أنها تقتلكم .. لازم تشوفو مين الى هيقتلكم وتتفقو معاه هيدفع ديه كام .. عشان بس موتكم ميروحش هدر كدة .. وياريت لو توثقوا العقد بتاع الديه دة فى الشهر العقارى .. وانا بناشد أى محامى نص كم من الى بيقف على الاقسام يستنى اى خناقه أو قضيه إنه يكتبلنا نص عقد جديد يرجى تعميمه هو عقد الديه .. وهو عقد بيكتبه المواطن المصرى مع المواطن الخليجى الى هيقتله بيتفقو فيه على الديه وطريقه القتل .. عشان بس حق القتيل ميروحش هدر ...

وعلى كدة بقا مكنش لنا حق نهاجم بضراوة الكاتب الكويتى فؤاد الهاشم الى كتب فى صحيفه الوطن عن سعر المواطن المصرى المتدنى ما الراجل كان عندة حق يا جماعه ...

أنا خلاص يا أعزائى قررت اشوفلى اى عقد عمل فى أى دوله خليجيه وأسافر اعملى كام مليون فى عشر سنين .. وارجع اقتل الزبال الى مش بياخد الزباله من عندنا عشان الدور عالى .. واقتل بياع الروبابيكيا الى بيعلى صوته وانا نايم " بيكياااااااااااااااااااااااااا " واقتل أستاذ محمود الى مدوخ الواد شهاب ابن اختى فى المدرسه ... ويمكن اخد خصم خاص وادفع مليون جنيه بس على التلاته دول .. ويمكن ابقا سعيد الحظ ويقولولى اقتل 3 وتقتل الرابع مجانا ...

والسلام

Labels: كلام فى السياسه, موضوعات ساخرة شاخرة

وصله دائمه

10 دماغكم

January 07, 2008

مذكرات دمويه

إضغط على الصورة لتكبير الغلاف

قبل أن تبدأ ...

هذة الروايه غير ملائمه للقراء المحافظين أو ذوى الإحساس المرهف .

هذة الروايه تحتوى على وصف دقيق لأحداث دمويه وجنسيه , ومحتواها الدينى والجنسى والدموى قد يكون صادما للعديد من القراء .

لذلك لا أنصح أحدا على الإطلاق بقراءة هذة الروايه .. وإن إستمرارك فى القراءة لما بعد هذة الصفحه , فهو على مسئوليتك الخاصه , والكاتب غير مسئول عن أى أثار جانبيه قد تنتج من قرائتك لها .

محمد حمدى

الجمعه 4 يناير 2008

نظرا لمحتوى الروايه الصادم .. ستكون متاحه للتحميل على شكل ملف PDF

إضغط بكليك يمين هنا ثم أختار Save target as للتحميل

رابط إحتياطى أخر على موقع 4shared

Labels: أدبيات

وصله دائمه

23 دماغكم

January 03, 2008

البلوجرز تايمز تعود من جديد

يا شعب البلوجرز العظيم ...

عاوزين نقولكم إن موقع ( بلوجرز تايمز ) تم إعادة إفتتاحه على العنوان التالى :

http://www.bloggers-times.blogspot.com/

لو حد منكم كان فاكر الإصدار الأول من الموقع حاز على إعجابكم كلكم , وكان فيه أقسام كتير متميزة زى مجمع المدونات العربى .. واحد من أسهل واشهر مجمعات التدوين فى العالم العربى .. دة غير التحقيقات الى كانت بتنقل لكم نبض المدونين فى كل مكان فى العالم العربى .

كل الأقسام دى وأكتر هتكون موجودة عندكم .. دة غير الأقسام الجديدة والنيولوك الخطير للسايت ..
الحاضر يعلم الغايب يا سادة إن البلوجرز تايمز راجع وبقوة لم يشهدها أحد من قبل ..

ليه تدخل 100 بلوج وإنت عندك بلوك واحد بيختصر لك كل حاجه ؟

متفوتش الفرصه وأدخل حالا .. وإدعمنا بالبانر والإعلان للسايت بكل الطرق الى تشوفها مناسبه .. أما لو قلمك جميل وعاوز تشاركنا بالكتابه .. قلبنا وعقلنا مفتوحين على مدار الساعه .. بس إنت إكتب وإبعت لنا .

تحياتنا ليكم .. .

Labels: موضوعات عامه

وصله دائمه

7 دماغكم