دة تحقيقى التانى فى مجله كلمتنا العدد الأخير ... التحقيق الأول هنا

إضغط على الصورة عشان تشوفه بالحجم الطبيعى أو أقرا الموضوع بالكامل فى أخر البوست

وكل الشكر لمصطفى فتحى , الى مش بس بيشجعنى لوحدى , دة بيشجع فريق كامل من الشباب هم محررين وكتاب مجله كلمتنا

تاكسى .. فاضى يا أسطى !

تجدونه فى كل مكان فى انحاء الجمهوريه ... يجوب المدون من أقصاها إلى أقصاها , أسمر فى القاهرة والغربيه , أصفر فى الإسكندريه , أخضر فى المنوفيه ... انه التاكسى , أو باللغه العربيه " سيارات الأجرة " يقودها فى الغالب شباب , فما هى قصه سائقى التاكسى ؟ وماهى مشاكلهم وتطلعاتهم ؟ هذا التحقيق يغوص فى هذا العالم المثير , ويلقى بالضوء على جوانبه المختلفه ...

فى البدايه يقول ( أحمد قنديل - 27 سنه ) : أنا شغال سواق تاكسى من فترة طويله , وبشتغل بالأجرة , يعنى التاكسى مش بتاعى , وبشتغل عليه أنا و ( محمد ) صاحبى كل واحد فينا ورديه , وبخلص شغل الساعه 1 بعد نص الليل وأنام لحد الساعه 7 الصبح , وأول ما أصحى أروح لصاحب التاكسى أديله 50 جنيه وأروح المحطه أملا بـ 15 جنيه بنزين للتاكسى , وأفضل طول اليوم أحاول ألم 65 جنيه من الزباين الى بركبهم , لو لميت أكتر من كدة يبقى مكسب حلال عليا , ولو أقل يبقى ربنا يعوضها فى اليوم الى بعدة …

وقد إكتشفت من باقى السائقين أن مبلغ الـ 50 جنيه والـ 15 جنيه للبنزين بمثابه (تسعيرة) ثابته ومعترف بها فى عالم التاكسى .

أما ( محمود جمال - 28 سنه ) فيقول : أنا كنت شغال على تاكسى لحساب واحد تانى , بس بعد كام سنه , ولما قرايبى ولاد الحلال ساعدونى , قدرت أشترى تاكسى وأشتغل عليه لحسابى , ودة أحسن قوى لأنه بيخلى مكسب التاكسى كله ليا , بس برضو بيكلفنى فلوس الصيانه , دة غير تعب ومشاكل تطليع الرخصه والتصريح والى بجد بتهد حيل أى سواق تاكسى لحد ما يعملها


وعن أطرف المواقف التى قابلها يقول ( محمد وفيق - 23 سنه ) : فى مرة ركب معايا راجل وست وقعدوا فى الكنبه الى ورا وقعدوا يهزروا ويضحكوا , بعد شويه وقفت التاكسى واحدة ست , وكانت مفجأه لكل الى فى التاكسى لما الست الى وقفت التاكسى طلعت مرات الراجل الى قاعد ورا , وإنها بالصدفه ( قفشته ) مع واحدة تانيه … وكانت فضيحه وخناقه لا يعلم بيها الا ربنا !


وعن مشاكل سائقى التاكسى يتحدث ( محمد عمر - 28 سنه ) فيقول : بيتنصب علينا كتير أوى , دة غير الزباين الى بتفاصل فى الأجرة , أو الى بتعمل خناقه على أى حاجه عشان متدفعش والسلام , ودايما الحاجات دى بتوصلنا للخناق , دة غير إن معامله ظابط المرور لسواق التاكسى غير لسواق العربيه الملاكى عشان – لامؤاخذة – روحنا فى إيدة , دة غير الخناقات مع أصحاب التاكسى على مواعيد الورديه وفلوس تصليح وصيانه التاكسى , ومنقدرش نفتح بقنا معاهم عشان مفيش شغلانه تانيه ومتقدرش تشترى تاكسى على حسابك


وعن التسليه أثناء القيادة يقول ( محمد حسن - 22 سنه ) : بحب أسمع جورج وسوف وميادة الحناوى وشعبولا , والقرأن فى أول اليوم اساسى عشان ربنا يبارك لى ويسترها معايا فى طريقى , وساعات بسمع نشره الأخبار كل ساعه , وساعات الزبون بيحب يسمع شريط محدد خصوصا لو كان المشوار طويل , ولو كان عندى الشريط مش بتأخر وبسمعهوله علطول


ويحكى ( محمود حسن - 24 سنه ) لموقف نصب تعرض له فيقول : واحد نصاب قالى مرة إن معهوش فكه , ونزل يفك من كشك سجاير , وأول ما وصل هناك لف حواليه وملقيتهوش , وقعدت أدور عليه كان أختفى .. كإنه ( فص ملح وداب ) !!


كانت هذة جولتى فى عالم التاكسى المثير , والملىء بالحكايات والمغامرات والتى من الممكن أن تتحول إلى فيلم سينيمائى .. ولم لا وقد حول المخرج الراحل عاطف الطيب ليله فى حياه سائق تاكسى ( نور الشريف ) إلى فيلم جميل بعنوان ليله ساخنه

محمد حمدى

Labels: صحافه